ត្រីមាសទី១ ឆ្នាំ២០២២ ក្រុមការងារ សហគមន៍នៃអាជ្ញាធរជាតិអប្សរាបានអនុញ្ញាតឱ្យពលរដ្ឋក្នុងតំបន់អង្គរជួសជុលផ្ទះ និងសាងសង់សំណង់ស្រាលចំនួន៣១៤សំណើ


សៀមរាប៖លទ្ធផលការងារសហគមន៍របស់អាជ្ញាធរជាតិអប្សរាប្រចាំត្រីមាសទី១ ក្នុងឆ្នាំ២០២២ បានចុះផ្សព្វផ្សាយអប់រំ និងពិនិត្យការស្នើសុំជួសជុលផ្ទះ រួមទាំងសាងសង់តូចតាចទាំង៥ស្រុក/ក្រុង ក្នុងតំបន់ឧទ្យានអង្គរ និងក្រៅតំបន់ឧទ្យានអង្គរបានចំនួន៤៣៩ សំណើ ដែលក្នុងនោះបានអនុញ្ញាតជូនប្រជាពលរដ្ឋចំនួន៣១៤សំណើ។

ក្នុងករណីអនុញ្ញាតជូនប្រជាពលរដ្ឋខាងលើ រួមមាននៅស្រុកប្រាសាទបាគងបានចំនួន៣២សំណើ ស្រុកអង្គរធំបានចំនួន២៥សំណើ ស្រុកពួកបានចំនួន៦៧ សំណើ និងក្រុងសៀមរាបបានចំនួន១៤១សំណើ ស្រុកបន្ទាយស្រី៤៨សំណើ ក្រុមការងារក្រៅឧទ្យានបានចំនួន០១សំណើ សរុបចំនួន៣១៤សំណើ។

បើទោះបីជាយ៉ាងណា បញ្ហាប្រឈមនៅតែមានដែលក្រុមការងារសហគមន៍បានជួបកន្លងមក ដូចជាការជួសជុល ឬការសាងសង់មុនការចុះពិនិត្យរបស់ក្រុម ការងារ ការប្រកាសលក់ដីក្នុងតំបន់ការពារតាមរយៈបណ្តាញទំនាក់ទំនងសង្គមហ្វេកប៊ុក និងការដាក់ស្លាក(ដីលក់) ផ្ទាល់ក្នុងតំបន់ការពារនៅតែមាន។

ជាគោលដៅបន្ត ក្រុមការងារសហគមន៍នៃអាជ្ញាធរជាតិអប្សរានឹងបន្តផ្សព្វផ្សាយ អប់រំប្រជាពលរដ្ឋឱ្យយល់កាន់តែច្បាស់ពីតួនាទី ភារកិច្ចរបស់អាជ្ញាធរជាតិអប្សរា ការប្រើប្រាស់ដីធ្លីក្នុងតំបន់ការពារនៃរមណីយ ដ្ឋានអង្គរ នីតិវិធីនៃការដាក់ពាក្យស្នើសុំជួសជុល និងសាងសង់ផ្ទះក្នុងឧទ្យានអង្គរឱ្យកាន់តែមានប្រសិទ្ធិភាពទាន់ពេលវេលា។

សូមបញ្ជាក់ថា រាល់ការស្នើសុំច្បាប់ជួសជុល គឺពុំមានការបង់ប្រាក់ទេ៕