និស្សិតសាកលវិទ្យាល័យភូមិន្ទកសិកម្មជាង៣០០ នាក់ស្វែងយល់ពីការអភិរក្ស និងអភិវឌ្ឍន៍រមណីយដ្ឋានអង្គរ


សៀមរាប៖ នៅព្រឹកថ្ងៃទី១៥ ខែមិថុនា ឆ្នាំ២០២២ នៅសាលសន្និសីទអង្គរ នៃអាជ្ញាធរជាតិអប្សរា បានរៀបចំសិក្ខាសាលាស្ដីពី ការគ្រប់គ្រង អភិរក្ស និងអភិឌ្ឍន៍តំបន់អង្គរ ដែលជាកិច្ចសហការរៀបចំឡើងដោយ មជ្ឈមណ្ឌលបណ្ដុះបណ្ដាលអង្គរ និងមហាវិទ្យាល័យរៀបចំដែនដី និងរដ្ឋបាលដីធ្លី នៃសាកលវិទ្យាល័យភូមិន្ទកសិកម្ម។ សិក្ខាសាលានេះ មាននិស្សិតសរុប ៣៥៤នាក់ចូលរួម។

សិក្ខាសាលាខាងលើរៀបចំឡើងក្នុងបំណង ស្វែងយល់ឱ្យកាន់តែច្បាស់ពីការងារគ្រប់គ្រង អភិរក្ស និងអភិវឌ្ឍន៍តំបន់រមណីយដ្ឋានអង្គរ ដែលផ្តោតសំខាន់ទៅលើផែនការអភិវឌ្ឍន៍តំបន់ និងការសាង សង់សំណង់ប្រវត្តិសាស្រ្ដផ្សេងនៅក្នុងទឹកនៃខេត្ត សៀមរាប។

សិក្ខាសាលានេះក៏មានការធ្វើបទបង្ហាញពីអ្នកជំនាញអាជ្ញាធរជាតិអប្សរាផងដែរ ក្នុងនោះរួមមាន លោក​ អ៉ឹម សុខរិទ្ធី ប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យា លោក ស៊ឹម ប៊ុនធឿន អនុប្រធាននាយកដ្ឋានរៀបចំដែនដី និងគ្រប់គ្រងលំនៅដ្ឋានក្នុងឧទ្យានអង្គរ និងលោក សេង សុធារ៉ា អនុប្រធាននាយកដ្ឋានអភិវឌ្ឍន៍ទេសចរណ៍អង្គរ។

បណ្ឌិត ហោ សានណារ៉ា ព្រឹទ្ធបុរសមហាវិទ្យាល័យរៀបចំដែនដី និងរដ្ឋបាលដីធ្លី ដែលបានដឹកនាំនិស្សិតចូលរួមសិក្ខាសាលាខាងលើ បានណែនាំឱ្យនិស្សិតទាំងអស់ខិតខំស្ដាប់ការពន្យល់របស់មន្រ្តីជំនាញតាមផ្នែករបស់អាជ្ញាធរជាតិអប្សរា ដើម្បីឱ្យបានដឹងកាន់តែច្បាស់ពីការរៀបចំ ការគ្រប់គ្រង អភិរក្ស និងអភិវឌ្ឍន៍រមណីយដ្ឋានអង្គរ ដែលជាដួងព្រលឹងរបស់ជាតិ។ លោកបណ្ឌិតថា វាពិតជាមានសារសំខាន់ណាស់ ដែលនិស្សិតទាំងអស់មានឱកាសបានសិក្សា និងអនុវត្តន៍ដោយផ្ទាល់ ជាមួយនឹងទ្រឹស្ដី និងការអនុវត្តតាមទីតាំងមួយៗ ដែលនឹងបង្ហាញដោយអ្នកជំនាញរបស់អាជ្ញាធរជាតិអប្សរា៕