បាញ់ទៀតហើយ.. មន្ត្រីប៉ូលីសម្នាក់បាញ់មេឃជាង១០គ្រាប់ផ្អើលខេត្តទេសចរណ៍សៀមរាបអង្គរ

   .យោងតាមរបាយការណ៍សមត្ថកិច្ចមូលដ្ឋាន បានបង្ហាញថា នាវេលាម៉ោង១៩និង៥៨នាទី ថ្ងៃទី០៥ ខែ មិថុនាឆ្នាំ២០២៣ មានករណីបាញ់មេឃ ដោយប្រើកាំភ្លើងម៉ាកAk៤៧ ប្រហែលជាង១០គ្រាប់នៅចំណុចភូមិគោកចាន់ ឃុំអំពិល ស្រុកប្រាសាទបាគង។

.របាយការណ៍បង្ហាញថា ករណីបាញ់នេះបង្កឡើងដោយឈ្មោះលួន សុផាន ភេទប្រុស អាយុ៣៥ឆ្នាំជា មន្ត្រីប៉ូលីសនៅកងអន្តរាគមន៍នៃស្នងការនគរបាលខេត្តសៀមរាប មានទីនៅភូមិគោកចាន់ ឃុំ អំពិល ស្រុកប្រាសាទបាគង ខេត្តសៀមរាប។
  .របាយការណ៍បញ្ជាក់ថា នៅមុនពេលកើតហេតុជនបង្ក បានផឹកស៊ីស្រវឹង ហើយក៏មានទំនាស់ពាក្យសម្តីជាមួយឪពុកមា ឈ្មោះ រស់ រំ ភេទប្រុស អាយុ៤៧ឆ្នាំភូមិកើតហេតុខាងលើ។ ក្រោយទាស់ពាក្យសំដី ឈ្មោះ លួន សុផាន បានជិះម៉ូតូចេញទៅបាត់ មួយសន្ទុះក្រោយមកក៏ឃើញត្រលប់មកវិញ មានទាំងស្ពាយកាំភ្លើងវែងប្រភេទ អាកា៤៧ មកជាមួយផង។

   ពេលមកដល់ ជនបង្កបានទាញកាំភ្លើងបាញ់គំរាមឪពុកមាជាច្រើនគ្រាប់(ជាង១០គ្រាប់)បន្ទាប់ពីបាញ់រួច ជនសង្សយ័ត្រូវបានខាងនគរបាល នៃស្នងការនគរ បាលខេត្តសៀមរាប ឃាត់ខ្លួនយកទៅដើម្បីអនុវត្តតាមនីតិវិធីច្បាប់។
   .ទោះជាបែបនេះ គេនៅមិនទាន់ឃើញសេចក្តីបំភ្លឺរបស់ស្នងការនគរបានខេត្តសៀមរាបនៅឡើយទេ ជុំវិញការផ្ទុះអាវុធក្នុងខេត្តទេសចរណ៍ សៀមរាបអង្គរនេះ។ អង្គភាពយើងនឹងលំអិតព័ត៌មាននេះបន្តទៀតបន្ទាប់ពីទទួលបានសេចក្តីបំភ្លឺពីស្នងការនគរបាលខេត្តសៀមរាប៕