Siem Reap Today Siem Reap Today
Related Articles
សៀមរាប៖ សិស្សានុសិស្ស ចាប់អារម្មណ៍ខ្ពស់ ក្រោយបានទស្សនាការតាំងពិព័រណ៌សមុច្ច័យផលិតចេញពីសសៃសូត្រ មានសម្លៀកបំពាក់ វត្ថុធាតុដើមសម្រាប់ផលិតក្រណាត់សូត្រតាមបែបប្រពៃណី កីតម្បាញ និងសម្លៀកបំពាក់សហសម័យ នៅក្នុងសារមន្ទីរវាយណភ័ណ្ឌប្រពៃណីអាស៊ី ក្រោមកិច្ចសហការគ្នារវាងប្រទេសចំនួន៦ នៅតាមដងទន្លេមេគង្គ និងទន្លេគង្គារ រួមមានប្រទេសកម្ពុជា ប្រទេសឥណ្ឌា ប្រទេសថៃ ប្រទេសឡាវ ប្រទេសភូមា និងប្រទេសវៀតណាម។
យុវជន សូត្រ សុខលាង មកពីវិទ្យាល័យប៊ុនរានីហ៊ុនសែនផ្សារដើមថ្កូវ រាជធានីភ្នំពេញ បានឱ្យដឹងថា ពេលបានមកទស្សនាសារមនី្ទរវាយណភ័ណ្ឌប្រពៃណីអាស៊ីនេះ មានអារម្មណ៍ប្លែកភ្នែក វត្ថុ ឬផលិតផលដែលតាំងបង្ហាញនៅទីនេះ ៩០ភាគរយដែលមិនធ្លាប់ឃើញពីមុន។ យុវជនរូបនេះ បន្តថា នៅក្នុងសារមន្ទីរមានតាំងសម្លៀកបំពាក់ កីតម្បាញលក្ខណៈបែបប្រពៃណីច្រើនប្រទេសផ្សេងគ្នា ឃើញថា ពិតជាការល្អមែនទែន ដើម្បីឱ្យសាធារណជន ជាពិសេសសិស្សានុសិស្សបានសិក្សាស្វែងយល់។
ដោយឡែកយុវតីម្នាក់ទៀត មកពីវិទ្យាល័យឬស្សីកែវ ឈ្មោះហៀង មុន្នីសុភា បានលើកឡើងថា លើកទី១ហើយដែលបានមកទស្សនាសារមន្ទីរវាយនភ័ណ្ឌប្រពៃណីអាស៊ី។ នៅទីនេះបានផ្តល់ចំណេះដឹងពីការស្លៀកពាក់របស់ប្រជាជននៅតាមបណ្តាប្រទេសផ្សេងៗ ហើយដែលបញ្ជាក់ពីអត្តសញ្ញាណជនជាតិនីមួយៗ ក៏ឃើញមានតាំងបង្ហាញនូវកីតម្បាញ មានទាំងរបស់ខ្មែរ និងប្រទេសដ៏ទៃទៀត។ យុវតី មុន្នីសុភា បញ្ជាក់ថា ខេត្តសៀមរាបក្រៅពីប្រាសាទក៏មានសារមន្ទីរដ៏សំខាន់ទៀត ដូច្នេះសាធារណជនទាំងអស់កុំរំលងសារមន្ទីរវាយណភ័ណ្ឌប្រពៃណីអាស៊ី ដ៏មានសារ ប្រយោជន៍មួយនេះ៕
