សៀមរាប÷ពលរដ្ឋប្រមាណ20គ្រួសារ ដែលជាម្ចាស់ក្បាលដីចំនួន20 បានបង្ហាញក្តីព្រួយបារម្ភយ៉ាងខ្លាំងក្រោយអាជ្ញាធរក្រុងចេញលិខិតជូនដំណឹងពីការចុះវាស់វែងលើក្បាលដីរបស់ពួកគាត់ជាថ្មី។
.ក្រុមពលរដ្ឋខាងលើ កាលពីរសៀលថ្ងៃទី២៣ខែមីនាឆ្នាំ២០២៦ បានកាន់ឯកសារមកឈរចាំក្រុមមន្ត្រីអាជ្ញាធរតាមក្បាលដីរៀងខ្លួន ស្ថិតក្នុងភូមិអញ្ចាញ សង្កាត់នគរធំក្រុង.ខេត្តសៀមរាប ត្រង់ចំណុចខាងត្បូងផ្លូវ៦០ម៉ត្រ អតីតភូមិព្រៃគុយ ឃុំអំពិល ស្រុក ប្រាសាទបាគង ប៉ុន្តែអាជ្ញាធរមិនបានចុះទៅវាស់វែងដូចតាមការកំណត់នោះទេ ថែមទាំងមិនផ្តល់ដំណឹងមកវិញថា ត្រូវចុះវាស់វែងពេលណាអោយពិតប្រាកដនោះដែរ។ តែពលរដ្ខម្ចាស់ក្បាលដីទាំងនៅក្នុងខេត្ត ទាំងនៅក្រៅខេត្ត ត្រូវចំណាយពេលរងចាំខាតទាំងការងារខាតទាំងមុខរបរប្រចាំថ្ងៃទៀត ចំណុចទាំងនេះហើយដែរពួកគាត់ព្រួយបារម្ភ ខ្លាចក្រែងពេលពួកគាត់ចាកចេញ មានការវាស់វែងដោយគ្មានម្ចាស់ចូលរួម។
.លោកឡាយ សុកថុល ពលរដ្ឋម្ចាស់ក្បាលដីលេខ ១៨៩ បានអោយដឹងថា ដីនេះរូបគាត់មានលិខិតកាន់កាប់តាំងពីឆ្នាំ២០០៧មកម្លេះ។ ដីខាងលើនេះស្ថិតក្នុងបុរីសណ្ឋាគារដែលគ្រប់គ្រងដោយអាជ្ញាធរជាតិអប្សរា។ លុះឆ្នាំ២០១៦ រាជរដ្ឋាភិបាលបានចេញអនុក្រិត្យលេខ១៥៨ កាត់ឆ្វៀលចេញពីបុរីសណ្ឋាគារហើយធ្វើប្រទានកម្មជូនប្រជាពលរដ្ឋតាមជាក់ស្តែង។
នៅក្នុងឆ្នាំ២០១៦ដដែលក្រោយពីគណ:កម្មការចំរុះចុះអនុវត្តអនុក្រិត្យមានជិត៣០០ក្បាលដី តែក្នុងពេលបិតផ្សាយក៍ស្រាប់តែអាជ្ញាធរជាតិអប្សរាប្តឹងជំទាស់លើក្បាលដីទាំងនោះ ដោយអះអាងថាបានដោះស្រាយគោលនយោបាយរួចហើយ ចាប់ពីពេលនោះក៍ពលរដ្ឋក៍បានប្តឹងតវ៉ាជាហូរហែរ។ លុះកំឡុងឆ្នាំ២០១៧,២០១៨ ក៍មានមនុស្សមួយក្រុមដើរចរចារជាមួយពលរដ្ឋបើអ្នកណាព្រមប្រគល់ដី៥០%(ពុះពាក់កណ្តាល) អោយទៅពួកគេនោះនឹងទទួលបានដីកម្មសិទ្ធិ(ប្លង់រឹង) ហើយមួយរយ: ក្រោយមកក៍ឃើញក្បាលដីមួយចំនួនធំបានប្លង់រឹងជាហូរហែរ និងនៅសល់តែប្រហែល៤០ក្បាលដីប៉ុណ្ណោះដែលមិនទាន់បានប្លង់ក្រោមហេតុផលបានដោះស្រាយគោលនយោបាយរួចហើយនិងមានឯកសារ(IRC) ត្រឹមត្រូវ។
កំឡុងឆ្នាំ២០២០,២០២១ ក្រោយពេលប្តូរទីតាំងដីពីភូមិព្រៃគុយ ឃុំអំពិល ទៅជាភូមិអញ្ចាញ សង្កាត់នគរធំ ពលរដ្ឋដែលមិនទាន់បានប្លង់បានដាក់លិខិតតវ៉ាជាហូរហែរពីក្រោមដល់លើ រហូតខុទ្ទកាល័យសម្តេចតេជោចេញចំណារមកអោយខេត្តដោះស្រាយវិញ នៅតែគ្មានដំណោះស្រាយ។ នៅឆ្នាំ ២០២៣ ក្រសួងរៀបចំដែនដីនគរូបនីយកម្មនិងសំណង់បានចេញលិខិតអោយធ្វើប្លង់ដីខាងលើប្រគល់ជូនទៅអាជ្ញាធរជាតិអប្សរា ហើយនៅថ្ងៃទី២៣ខែមីនាឆ្នាំ២០២៦អាជ្ញាធរក្រុងបានលិខិតចុះវាស់វែងទើបពួកគាត់ប្រមូលគ្នាមករងចាំបែបនេះ។
.លោកឡាយ សុកថុល បញ្ជាក់ថា ពួកគាត់ទាំង២០ក្បាលដីខាងលើ មិនដែលបានទទួលការដោះស្រាយគោលនយោបាយពីអាជ្ញាធរថ្នាក់ណាម្តងណាឡើយ អីចឹងទេសូមអាជ្ញាធរគ្រប់ជាន់ថ្នាក់មេត្តាចុះមកពិនិត្យដោយផ្ទាល់និងយកឯកសារដោះស្រាយគោលនយោ បាយមកបង្ហាញផង បើមានមែននឹងប្រគល់ដីជូន។តែបើមិនមានឯកសារបញ្ជាក់ពីការដោះស្រាយទេ សូមមេត្តាផ្តល់ប្លង់កម្មសិទ្ធិដល់ពួកគាត់ដោយអនុគ្រោះផងចុះ។
.ចំណែកស្រ្តីឈ្មោះណៅ អាំងហួយ ជាគ្រូបង្រៀនម្នាក់ក៍បានលើកឡើងស្រដៀងឡាយ.សុកថុល ដែរដោយបញ្ជាក់ថាក្បាលដីរបស់គាត់ដែលបានសង់ផ្ទះរួចហើយមានត្រឹម៦×២០ម៉ែត្រប៉ុណ្ណោះមិនមានប្លង់ទេ តែអ្នកនៅសង ខាងបានប្លង់អស់ហើយ។ ស្ត្រីខាងលើបន្តថា កាលពីកន្លងទៅមានគេមកចរចារសុំ៧០០ដុល្លារនឹងចេញប្លង់អោយ តែគាត់មិនមានលុយអោយគេក៍ត្រូវមានឈ្មោះក្នុងលិខិតជូនដំណឹងពីការវាស់វែងថ្ងៃទី២៣ខែមីនាឆ្នាំ២០២៦នេះដែរ។
.ក្រៅពីស្ត្រីជាគ្រូបង្រៀន ក្រុមពលរដ្ឋម្ចាស់ក្បាលដីទាំង២០ខាងលើ ក៍បានទទូចស្នើសុំអាជ្ញាធរពីថ្នាក់ក្រោមដល់លើមេត្តាផ្តល់ប្លង់កម្មសិទ្ធិដល់ពួកគាត់ផង ត្បិតរាជរដ្ឋាភិបាលបានធ្វើប្រទានកម្មអោយពួកគាត់យូឆ្នាំមកហើយ។ ម្យ៉ាងវិញទៀតនៅសុខៗអាជ្ញាធរចេញលិខិតមកបិតលើក្បាលដីស្តីពីវាស់វែងជាហូរហែរ អោយពលរដ្ឋមករងចាំ តែគ្មានមន្ត្រីណាម្នាក់ចុះមកសោះ នេះជាសញ្ញាបន្លាចពលរដ្ឋអោយភ័យខ្លាចរត់ ចោលដីមែនទេ? បើអីចឹងពួកខ្ញុំពលរដ្ខទាំង២០គ្រួសារសល់តែជម្រើចុងក្រោយ គឺដាក់បណ្តឹងទៅសម្តេចហ៊ុន ម៉ាណែត ដើម្បីសុំអន្តរាគមន៍ប៉ុណ្ណោះ។
.ទោះបីក្រុមពលរដ្ឋ២០គ្រួសារដែលអះអាងថា ម្ខាស់ក្បាលដីទាំង២០ខាងលើ បាននាំគ្នាឈរកាន់ឯកសារតាមក្បាលដី ផ្តល់ព័ត៌មានខ្លះដល់អ្នកកាសែតជុំវិញដីទំនាស់ដ៌រ៉ាំរ៉ៃនេះ គេនៅមិនទាន់ឃើញអាជ្ញាធរចេញមកឆ្លើយតបយ៉ាងណានោះទេ អង្គភាពសារព័ត៌មានយើងរងចាំបកស្រាយ រាល់ការឆ្លើយតបពីអាជ្ញាធរ.៕
