សមត្ថកិច្ច ខេត្តសៀមរាប ចាប់ត្រីប្រាក្លាសេ ដែលនាំចូលមកពីប្រទេសថៃយកទៅផាកពិន័យ​ ខណ: សមត្ថកិច្ចតាមច្រករបៀងបើកបង្ហូរអោយនាំចូលក្នុងមួយថ្ងៃៗរាប់សិបតោន

សៀមរាប៖ត្រីប្រាក្លាសេរជាង៣តោន ដែលសមត្ថកិច្ចនៅតាមច្រករបៀងបើកបង្ហូរអោយចូលខុសច្បាប់ពីប្រទេសថៃ ត្រូវកម្លាំងសមត្ថកិច្ចជលផល​ និងកម្លាំងនគរបាលប្រឆាំងបទល្មើសសេដ្ឋកិច្ចខេត្ត ក្រោមការចង្អុលបង្ហាញពីលោកឧត្តមសេនីយ៍ទោហួត សុធី​ ស្នងការនគរបាលខេត្តសៀមរាប ចាប់យកទៅផាក​ពិន័យ​ ហើយប្រគល់អោយម្ចាស់យកទៅបន្តចែក​ចាយវិញ។
  ត្រីប្រាក្លាសេទាំងនេះ​ ត្រូវក្រុមឈ្មួញលួចនាំចូលតាមច្រករបៀងកម្ពុជាថៃ​ ក្នុងស្រុកម៉ាឡៃខេត្តបន្ទាយមាន​ជ័យ ដឹកតាមរថយន្តធុនសាំយ៉ុងដោយគ្មានច្បាប់អនុញាតយកទៅស្តូប​ទុក​ ហើយបែងចែកបន្តទៅស្រុកបវេល ខេត្តបាត់ដំបង ឆ្លងកាត់ខេត្តបន្ទាយមានជ័យ ចូលខេត្តសៀមរាប ហើយក៍ត្រូវក្រុមសមត្ថកិច្វក្របួចជាប់កាលពីរសៀលថ្ងៃទី១៦ខែឧសភា ឆ្នាំ២០២៥ នៅចំណុចភូមិកំពុងតាយ៉ង ឃុំពួក ស្រុកពួក ខេត្ត​សៀមរាប។

   លោកធិននី សុទ្ធី នាយខណ្ឌរដ្ឋបាលជលផលខេត្ត​សៀមរាប បានឲ្យអ្នកព័ត៍មានដឹងថា ក្នុងពេលចុះបង្ក្រាប​  រថយន្តដឹកត្រីខាងលើបានព្យាយាមបើកគេច​ តែក៏ត្រូវសមត្ថកិច្ចតាមឃាត់បានរថយន្ត​ ម៉ាកសាំយ៉ុងមួយគ្រឿងពណ៌ស ពាក់ស្លាកលេខព្រះសីហនុ2A.9942 ដឹកត្រីប្រាក្លាសេទឹកកក​ ដែលមានទម្ងន់ប្រមាណជា​៣.០០០គីឡូក្រាមដែលដឹកជញ្ជូន ដោយគ្មានលិខិត​អនុញ្ញាត គឺជាបទល្មើសជលផល។ ក្នុងខណៈពេលដែល​កំពុង​ ឃាត់រថយន្តខាង​លើ​ សមត្ថកិច្ចក៍បានឃាត់រថយន្ត​ម៉ាក​កាម៉ារីកែឆ្នៃមួយគ្រឿងទៀតដែលផ្ទុកត្រីសម្រាប់ធ្វើចំណីក្រពើគ្មានលិខិតអនុញាតផងដែរ។

ក្រោយពីសមត្ថកិច្ចបានពិនិត្យរួចរាល់ វត្ថុតាង​ រថយន្តសាំយ៉ុងនិងរថយន្តកាមរី​ រួមទាំងត្រីប្រាខ្លាសេរចំនួន​៣.០០០គីឡូក្រាម បានប្រគល់ទៅឲ្យម្ចាស់វិញ បន្ទាប់​ពីបានផាកពិន័យតាមច្បាប់រួចរាល់។

ប្រភពព័ត៌មានបានអោយដឹងថា ត្រីប្រាក្លាសេកំពុងសម្រុកចូលពីប្រទេសថៃ មកកម្ពុជាខុសច្បាប់តាមច្រករបៀងនានា ស្ថិតក្នុងទឹកដីខេត្តបាត់ដំបងនិងខ្លះនាំចូលតាមច្រករបៀងខេត្តបន្ទាយមានជ័យ បន្លំទីផ្សារត្រីក្នុងស្រុកក្នុងមួយថ្ងៃៗពី២០ទៅ៣០តោន។មិនតែប៉ុណ្ណោះបន្តដឹកជញ្ជូនចែកចាយលក់យ៉ាងពេញបន្ទុកតាមបណ្ដាខេត្តផ្សេងៗដូចជាបន្ទាយ​មាន​ជ័យ ខេត្តសៀមរាបនិងខេត្តកំពង់ធំ និង​បាត់ដំបង ជាដើម។

  ប្រភពបន្ថែមថា ត្រីប្រាក្លាសេរ ក៍មិនខុសពីសាច់ក្លាសេរនោះដែរ ការនាំចូលចូលពីក្រៅប្រទេសគេចមិនផុតពីមានសារធាតុគីមីនោះឡើយព្រោះគេដាក់ការពារសាច់ឬត្រីកុំអោយស្អុយ។ ប៉ុន្តែប្រសិនបើសមត្ថកិច្ចចាប់ហើយ​ ត្រឹមតែយកទៅផាកពិន័យ​ រួចប្រគល់អោយ​ឈ្មួញយកទៅចែកចាយវិញដដែល​ ហើយពលរដ្ឋទិញយកទៅបរិភោគដដែល នោះវាមិនខុសអីពីពាក្យថា ០+០=០​ នោះឡើយ។
  ជាមួយនិងហេតុការណ៍ដដែលៗនេះ ពលរដ្ខទទូចសុំអោយថ្នាក់លើជួយដាស់តឿនដល់សមត្ថកិច្ចប្រចាំតាមច្រករបៀងផងល្ម​មភ្ញាក់ខ្លះទៅ​ ព្រោះសម្ងំដេកនេះវាយូក្រែលដែរហើយ។ ចំណែកសមត្ថកិច្ចតាមដងផ្លូវ​ក៍ដូចគ្នាដែរ សូមបង្ក្រាបហើយអនុវត្តច្បាប់អោយមាន​ប្រសិទ្ទិភាព​ កុំប្រើក្បាច់គោះទឹកអោយត្រីរត់ចូលទ្រូ៕