ខេត្តសៀមរាប=បឹងពារាំង គឺជាបឹងធម្មជាតិមួយដ៍ធំមួយ ហើយមានផ្ទៃទឹកល្វឹងល្វើយ ហ៊ុំពទ្ធ័ដោយព្រៃលិចទឹកក្រាស់ៗដែលជាអំណោយផលសម្រាប់ត្រីពងនិងកូន។ ក្រៅពីនោះវាបានផ្តល់ជាជម្រកដល់ប្រភេទសត្វល្មូន ជាពិសេសបានផ្តល់ជាជម្រកសត្វស្លាបរាប់រយប្រភេទផងដែរ។
បឹងធម្មជាតិមួយនេះ ក្រៅពីផ្តល់ជាជម្រកត្រីនិងសត្វក្នុងការរស់នៅបន្តពូជ វាក៍ជាតំបន់ទេសចរដ៍ទាក់ទាញមួយផងដែរ ក្រៅពីប្រាង្គប្រាសាទបុរាណនិងរមណីយដ្ឋានផ្សេងៗ ត្បិតបឹងពារាំងអ្នកទេសចរអាចទស្សនាព្រៃលិចទឹក រួមទាំងសត្វស្លាបជាច្រើនប្រភេទផងដែរ។ បឹងនេះមានទីតាំងនៅផ្នែកខាងត្បូងសង្កាត់ជ្រាវ នៃក្រុងសៀមរាប ជាប់និងមាត់បឹងទន្លេសាប។
ដោយសក្តានុពលនៃបឹងនេះ តាមរយ:អាជ្ញាធរមូលដ្ឋាន ក៍បានស្នើសុំបង្កើតជាសហគមន៍ ដែលមានឈ្មោះថា សហគមន៍ទេសចរណ៍ វប្បធម៍ធម្មជាតិ បឹងពារាំង ក្នុងគោលបំណងថែរក្សានិងអភិរក្សត្រីមេពូជ សត្វគ្រប់ប្រភេទ ព្រៃលិចទឹក និងទាក់ទាញភ្ញៀវទេសចរជាតិនិងអន្តរជាតិផងដែរ ដោយមានលោក គង់ មង្គល ជាប្រធាន។ មកទល់ពេលនេះគេសង្កេតឃើញសត្វគ្រប់ប្រភេទនិងត្រី មានការកើនឡើង បន្ទាប់ពីមានការជីកស្តាររក្សាទឹកក្នុងការសង្គ្រោះនារដូវប្រាំង។
ប៉ុន្តែត្រី សត្វ ព្រៃលិចទឹក រួមទាំងជីវ:ចម្រុះ នៅក្នុងបឹងពារាំង អាចនឹងបាត់បង់ត្រឹមតែមួយប៉ព្រិកភ្នែក ប្រសិនបើមានការរំសាយសហគមន៍បឹងពារាំងនេះចោល ដូចព័ត៍មានដែលលេចធ្លាយល្ហៀងៗនាពេលថ្មីៗនេះមែន។តាមព័ត៍មានដែលលិចធ្លាយ បានឮល្ហៀងៗថា មន្ត្រីក្នុងសហគមន៍អស់ជំនឿចិត្តខ្លួនឯងព្រោះតែថ្នាក់លើមិនផ្តល់តម្លៃ។ ការងារមិនមានប្រាក់ខែ ធ្វើការមិនគិតថាយប់ឬថ្ងៃ តែរងការចោទថា បំផ្លាញធនធានធម្មជាតិនៅតំបន់បឹងពារាំងទៅវិញ។
ជុំវិញព័ត៍មានដែលលិចឮថា មន្ត្រីគ្រោងធ្វើលិខិតជូនថ្នាក់លើសុំរំសាយសហគមន៍បឹងពារាំងចោល លោកគង់ មង្គល ប្រធានសហគមន៍ទេសចរណ៍ វប្បធម៍ធម្មជាតិបឹងពារាំង មិនធ្វើអត្ថាធិប្បាយវែងទេ ដោយលោកបញ្ជាក់ខ្លីថា ប្រសិនបើថ្នាក់លើ រួមទាំងក្រសួងពាក់ពន្ធ័ មិនជួយសហការគាំទ្រទេ អាចនិងរំសាយមែន។ព្រោះការជីកស្តារបឹងរក្សាទឹកសង្គ្រោះត្រីមេពូជនារដូវប្រាំង បែជារងការចោទថាធ្វើអាជីវកម្មទៅវិញ។ក្រៅពីនោះក៍មានការចោទថា លើកផ្លូវគ្មានច្បាប់ក្នុងតំបន់3 និងឈូសព្រៃក្នុងតំបន់2 កាត់ឆ្វៀលអត់ច្បាប់។
ចំណែកលោក ក្អោប រ៉ន ចៅសង្កាត់ជ្រាវ ក៍បានបញ្ជាក់ស្រដៀងលោកគង់មង្គលដែរ លោកថា មន្ត្រីសហគមន៍ទាំងប៉ុន្មានសុទ្ធតែគ្មានប្រាក់ខែទាំងអស់ តែពួកគេស្មគ្រ័ចិត្តជួយបំរើការងារសហគមន៍មិនគិត ថាយប់ឬថ្ងៃ។ តែក្នុងរយ:ពេលនេះមន្ត្រីទាំងនោះហាក់អស់ជំនឿចិត្តខ្លួនឯង ដោយម្នាក់ៗចង់សុំដកខ្លួនចេញពីសហគមន៍។ ចំពោះរឿងថា គ្រោងរំសាយសហគមន៍ លោកចៅសង្កាត់បញ្ជាក់ថាលោកមិនទាន់ដឹងច្បាស់នោះទេ តែបើមន្ត្រីទាំងអស់នោះលាឈប់មែន.គឺវាដូចជារំសាយសហគមន៍អីចឹងតែម្តង។
ចំពោះព័ត៍មាននេះដែរ ក៍មានពលរដ្ឋមួយចំនួនបានវែកញែកគ្នានៅតាមតុកាហ្វេ ពិសេសពលរដ្ឋក្នុងសង្កាត់ជ្រាវ ដោយអ្នកខ្លះលើកឡើងថា ហេតុអីនៅសុខៗក៍ឮដំណឹងថា គេចង់រំដាយបឹងពារាំងចោល? បើអីចឹងមែនតើខាងណាមកគ្រប់គ្រងជំនួស? តែបើនៅសុខៗរំសាយមែន តែមួយប៉ព្រិកភ្នែកទាំងត្រី សត្វនិងព្រៃរលាយដូចអំបិលត្រូវទឹកអីចឹង។
ចំណែកអ្នក មួយចំនួនទៀតក៍បានលើកឡើងថា បើក្រុមមន្ត្រីសហគមន៍ខំថែរក្សាអភិរក្សច្រើនឆ្នាំមករីកចម្រើនប៉ុណ្ណឹងហើយបែជាថ្នាក់លើមើលមិនឃើញហើយមកចោទថាធ្វើអាជីវកម្មនាំគ្នាដកខ្លួនចេញក៍ល្អដែរ ទុកអោយថ្នាក់លើមកអភិរក្សខ្លួនឯងទៅ។
ទោះបីយ៉ាងណា ពលរដ្ឋដែលបានដឹងដំណឹងនេះ កំពុងបង្ហាញការសោកស្តាយធនធានធម្មជាតិ បើសិនជាមានការរំសាយសហគមន៍បឹងពារាំងចោលមែន៕