ខេត្តសៀមរាប៖ កម្លាំងនគរបាលព្រហ្មទណ្ឌ កាលពីរសៀលថ្ងៃទី២៥ខែតុលា ឆ្នាំ២០២៤នេះ បានចាប់ខ្លួនចាងហ្វាងកាសែតអនឡាញ និងជាមគ្គុទ្ទេសក៍ទេសចរណ៍ម្នាក់ តាមដីកាបង្គាប់អោយចាប់ខ្លួនរបស់តុលាការ នៅម្តុំផ្លូវត្រាំនាគ សង្កាត់ស្លក្រាម ក្រុង.ខេត្តសៀមរាប។
យោងតាមប្រភពពីកម្លាំងសមត្ថកិច្ចដែលចុះអនុវត្តការចាប់ខ្លួននេះ បាននិយាយក្នុងលក្ខខណ្ឌមិនបញ្ចេញឈ្មោះថា ជនដែលត្រូវចាប់ខ្លួននេះ មានឈ្មោះ ស៊ឹម ឈីវឈានពិសិដ្ឋ ភេទប្រុស មានទីលំនៅភូមិទ្រាំង សង្កាត់ស្លក្រាម ក្រុង.ខេត្តសៀមរាប ។
ប្រភពបន្តថា ការចាប់ខ្លួនលោកចាងហ្វាងរូបនេះ ធ្វើឡើងតាមដីកាបង្គាប់ឲ្យចាប់ខ្លួនរបស់ព្រះរាជអាជ្ញារង នៃអយ្យការអមសាលាដំបូងខេត្តសៀមរាប ដែលការបង្គាប់ឲ្យចាប់ខ្លួននេះ ក៏ទៅតាមអំណាចសាលដីកាស្ថាពររបស់សាលាឧទ្ធរណ៍ខេត្តបាត់ដំបងផងដែរ។
លោក ស៊ឹម ឈីវឈានពិសិដ្ឋ អតីតអនុប្រធានមន្ទីរបរិស្ថានខេត្តសៀមរាប បច្ចុប្បន្នជាចាងហ្វាងសារព័ត៌មានអនឡាញ និងជាមគ្គុទ្ទេសក៍ទេសចរណ៍ប្រចាំតំបន់អង្គរផងដែរ។
យោងតាមដីកាបង្គាប់ឲ្យចាប់ខ្លួនដែលអ្នកសារព័ត៌មាន ទទួលបាន នៅព្រឹកថ្ងៃទី២៦ ខែតុលានេះ បានឲ្យដឹងថា លោកឈីវឈានពិសិដ្ឋ ត្រូវបានលោក គង់ មង្គល ប្រធានសហគមន៍ទេសចរណ៍បឹងពារាំង ក្នុងសង្កាត់ជ្រាវ ដាក់ពាក្យប្តឹងទៅតុលាការ ពីបទប្តឹងបរិហារបង្កាច់កេរ្តិ៍ ប្រព្រឹត្តនៅរាជធានីភ្នំពេញ កាលពីថ្ងៃទី២០ ខែកុម្ភៈ និងថ្ងៃទី១៩ ខែកញ្ញា ឆ្នាំ២០១៩។
ហើយបន្ទាប់ពីអនុវត្តតាមនីតិវិធីជាបន្តបន្ទាប់នៅថ្ងៃទី០៩ ខែមីនា ឆ្នាំ២០២១ សាលាដំបូងខេត្តសៀមរាប បានចេញសាលក្រម ផ្តន្ទាទោសលោក ឈីវឈានពិសិដ្ឋ ដាក់ពន្ធនាគារ កំណត់រយៈពេល៦ខែ និងពិន័យជាប្រាក់មួយលានរៀល។
ដោយសារមិនសុខចិត្តនឹងសាលក្រមនេះ លោកពិសិដ្ឋ បានប្តឹងទាស់ និងប្តឹងឧទ្ធរណ៍តាមកំណត់ច្បាប់ ប៉ុន្តែការប្តឹងនោះសុទ្ធតែត្រូវបានតុលាការគ្រប់ជាន់ថ្នាក់ដែលចាត់ការសំណុំរឿងនេះ បានសម្រេចតម្កល់សាលក្រមរបស់សាលាដំបូងខេត្តសៀមរាបទុកជាបានការដដែល និងបន្តដល់សាលដីការបស់សាលាឧទ្ធរណ៍បានចូលជាស្ថាពរ៕
