.បាត់ដំបង ៖ទីបំផុតសំណង់(រីសត)ដែលសង់រំលោភចូលស្ទឹងសង្កែ ដែលមហាជនរិះគន់ស្ទើពេញប្រទេសត្រូវម្ចាស់សំណង់ យល់ព្រមវាយកម្ទេចចោលមួយផ្នែក។
.លោកសុខ លូ អភិបាលខេត្តបាត់ដំបង នៅព្រឹកថ្ងៃ ទី២៤ខែមិថុនា ឆ្នាំ២០១៣ បានដឹកនាំមន្ត្រីចុះពិនិត្យនិង បានសហការជាមួយម្ចាស់សំណង់ ក្នុងការវាយ កម្ទេចចោលមួយផ្នែក។
.ក្រោយពេលពិនិត្យ លោកហាក់ទទួលស្គាល់ថា រឿងនេះពិតជាមានការរិះគន់ខ្លាំងពីមហាជនមែន ពិសេសអ្នកលេងបណ្ដាញសង្គម និង ប្រព័ន្ធផ្សព្វផ្សាយមួយចំនួនបានវាយប្រហារលោកមិនសំចៃដៃ អំពីសំណង់ខាងលើនេះ ។
.លោកអភិបាលខេត្ត បញ្ជាក់ថា តាមពិតលោកមិនបានដឹងពីការសាងសង់សំណង់រីសតនេះទេ ព្រោះគេធ្វើតាំងពីរូបលោកមិនទាន់មកកាន់ជាអភិបាលខេត្តបាត់ដំបងម្ល៉េះ ។
.លោកអភិបាលខេត្ត បញ្ជាក់ថា ខណ:នេះបានឲ្យមន្ត្រីជំនាញគូសវាស់ជាក់ស្ដែង លើទីតាំងសំណង់តាមបច្ចេស ដើម្បីឲ្យដឹងថា តើសំណង់បេតុងនេះ បានសាងសង់រំលោភលើដីចំណីស្ទឹងប៉ុន្មានមែត្រ។
ក្រោយត្រួតពិនិត្យជាក់ស្ដែង ម្ចាស់សំណង់ក៏បានឯកភាពរួចហើយ ក្នុងការវាយកម្ទេចលើចំណុចដែលប៉ះពាល់លើដីមាត់ស្ទឹង ។
.ជាមួយគ្នានោះ លោកអភិបាលខេត្តបាត់ដំបង បានបញ្ជាក់ថា មាន៣ចំណុច ដែលម្ចាស់សំណង់បានយល់ព្រមតាមសំណើរបស់រដ្ឋបាលខេត្ត ទី១ ត្រូវកាយអាចម៍ដីឲ្យអស់ពីបាតស្ទឹង។ ទី២ ត្រូវវាយកម្ទេចចោលសំណង់(វ៉េរ៉ង់ដា)ដែលធ្វើលយចូលមាត់ស្ទឹង និងទី៣ ត្រូវរៀបចំសាងសង់ជើងទេជំរេលច្រាំងស្ទឹងឲ្យរឹងមាំតាមលក្ខណ:បច្ចេកទេស ។
.កិច្ចការវាយបំផ្លាញចោលសំណង់ល្មើសច្បាប់ និងស្ថាបនាច្រាំងស្ទឹងខាងលើនេះ គឺជាបន្ទុករបស់ក្រុមហ៊ុន(ឧកញ៉ា ទុយ គី) ដែលទទួលសាងសង់គម្រោងនេះពីម្ចាស់រីសត ។
.សូមជម្រាបជូនថា សំណង់រីសត ដែលសង់រំលោភចូលស្ទឹងសង្កែ ស្ថិតនៅភូមិបោះពោធិ ឃុំអូរដំបង១ ស្រុកសង្កែ ខេត្តបាត់ដំបង។ នៅប៉ុន្មានថ្ងៃមុននេះ មានការផ្សព្វផ្សាយរិះគន់តៗយ៉ាងខ្លាំង រហូតរដ្ខបាលខេត្តបាត់ដំបង ចេញសេចក្តីបំភ្លឺព័ត៌មាន ដោយបញ្ជាក់ថា សំណង់ខាងលើមិនមានការរំលោភចូលស្ទឹងនោះទេ។ តែទីបំផុត ក៍សម្រេចវាយកម្ទេចចោលមួយផ្នែក បន្ទាប់ពីរកឃើញថា បានសង់រំលោភចូលស្ទឹងសង្កែ ដែលជាស្ទឹងប្រវត្តិសាស្ត្រ របស់ដូនតាខ្មែរ៕